blogiadur

A peth arall da am e-lyfrau…

Ifan Morgan Jones — Sat, 04 Feb 2012 20:00:00 +0000

Un o brif fanteision e-lyfrau yw y bydd y llyfr ar gael i’wlawrlwytho ar y we ymhell ar ôl iddo ddiflannu o shilffoedd y siopau llyfrau.Anaml iawn erbyn hyn ydw i’n gweld copi o Igam Ogam neu Yr Argraff Gyntaf mewnsiopau sy’n gwerthu llyfrau printiedig Cymraeg, ond fe fydd yr e-lyfrau ar y rhith-shilff‘am byth’.

Mae cael ei uwchlwytho i siop Kindle wedi rhoi bywydnewydd i’r Argraff Gyntaf. Dros y dyddiau diwethaf rydw i wedi derbyn negeseuongan bobol ar Twitter yn dweud eu bod nhw wedi ei lawrlwytho a’i ddarllen. Mae’nannhebygol iawn y bydden nhw wedi gweld a phrynu copi mewn siop lyfrau erbynhyn.

Catrinbeard: Argymhelliad yrwythnos: Yr Argraff Gyntaf @ifanmjDechre araf, ond wedyn CYFFRO! DIHIROD! BOMS! a darlun difyr o Gaerdydd dechG20 #darllen

Catrinbeard: Gyda llaw mae nofel @ifanmj ar Cindl – os oesgennoch chi un, prynwch o leiaf un llyfr Cymraeg, er mwyn cael rhagor #darllen #21ainganrif

Garethe66: @ifanmj newydd gorffen yrargraff gyntaf ar y kindle, gret wedi joio, da iawn.

Cyn i chi feddwl mai hysbyseb tila arall i lyfrau arKindle yw’r cofnod yma, rydw i wedi sylweddoli dros yr wythnosau diwethaf ar unpeth sydd ddim cystal ynglŷn ag e-lyfrau. Dwn i ddim a oes unrhyw un arall wedisylweddoli, ond mae yna yna nifer sylweddol uwch o gamgymeriadau mewn e-lyfrauna mewn llyfrau print. Mae hyn yn wir am y llyfrau Cymraeg a Saesneg yr ydw iwedi eu lawrlwytho. Mae’r copi digidol o A Game of Thrones yr ydw i’n eiddarllen ar hyn o bryd yn llawn gwallau, er ei fod ar frig siart siop KindleAmazon.

Beth sy’n gyfrifol am hyn? Ydi’r e-lyfr wedi etiffedu yr agweddfwy ffwrdd âhi at gywirdeb ar y we, yn hytrach na phrwffio diwyd byd print? Testun blogiadarall, efallai…

y cardiau post

Emma Reese — Sat, 04 Feb 2012 19:38:00 +0000

Roedden nhw rhwng tudalennau un o’r llyfrau sy’n pentyrru. Roeddwn i’n chwilio amdanyn nhw ers misoedd yn credu’n siŵr na fyddwn i byth wedi eu tablu nhw – dau gerdyn post a anfonwyd gan gwpl tra oedden nhw ar eu gwyliau yn yr Eidal ddwy flynedd a hanner yn ôl. Pan dderbyniais i’r cardiau, fedrwn i ddim dychmygu y byddwn i’n dysgu’r Eidaleg un diwrnod. Mae yna gyfuniad rhyfedd – cardiau post o’r Eidal a sgrifennwyd yn Gymraeg.

Lle mae Totoro? Na, chewch chi mo’i weld o bob tro. Ella rywdro…

Enw Newydd: Rubalcaba

cathasturias — Sat, 04 Feb 2012 16:54:14 +0000

Cymryd hoe rhwng yr holl rygbi sydd ar y teledu i gofnodi ambell i beth am arweinydd newydd y PSOE (sosialwyr).

Alfredo Pérez Rubalcaba sydd wedi ei hennill o 22 bleidlais yn unig 487 yn erbyn 465. Dyw hynny ddim yn bleidlais eang iawn, medd rhywun, wel nag yw. Mae’r PSOE yn dilyn yr hen drefn o ethol ei harweinydd mewn cynhadledd, gyda’r cynrychiolwyr yn bwrw pleidlais yn ôl dymuniad eu hardal/talaith.

Rubalcaba felly yw ysgrifennydd cyffredinol (maen nhw’n cadw at yr hen deitlau hefyd) newydd y PSOE yn olynu’r cyn brif weinidog Zapatero. 60 oed, yn y blaid gydol ei oes, yng nghabinet Zapatero fel gweinidog materion cartref a dirprwy iddo hefyd. Yn ôl y rhai oedd yn cefnogi’r ymgeisydd arall, Carme Chacon, mae’r blaid wedi colli cyfle i symud mlân cenhedlaeth, symud mlân i’r byd newydd technolegol di-waith. Roedd hithau yn weinidog (amddiffyn) yn llywodraeth Zapatero, ond mae’n ifancach, yn fenyw, ac yn dod o Catalunya, sydd yn rhyw fath o faes arbrofol yng ngwleidyddiaeth Sbaen.

Fydd gydag e ddim munud i eistedd yn ei swyddfa newydd: daw etholiadau cymunedol Andalucia, cymuned mwyaf Sbaen, cyn diwedd mis Mawrth, (yr un diwrnod â’r etholiadau annisgwyl yn Asturias.) Ac os bydd prif weinidog Sbaen, Mariano Rajoy, yn gwireddu hanner y pethau mae e wedi cyhoeddi, fe fydd yn jobyn llawn amser ei wrthwynebu yn enw’r gweithwyr a’r di-waith.

Ydy’r ffaith fod y bleidlais mor agos yn awgrymu nad yw’r PSOE yn unedig? Adwaith Carme Chacon a’i chefnogwyr fydd yn dangos a yw hynny’n wir neu dim ond yn gyhuddiad a geir gan wleidyddion o bleidiau eraill.

Bae Colwyn o’r goedwig. Ffotograff o tua 1890

melyn — Sat, 04 Feb 2012 14:13:47 +0000

Dyma lun o Fae Colwyn o gyfeiriad y goedwig uwchben lleoliad Parc Eirias dwi’n credu. Tynnwyd y llun yn negawd olaf C19 a daw o gasgliad Llyfrgell Congress UDA. Caeau glas ble bydd tai. Parhau i ddarllen →

Llwytho rhaglenni BBC iPlayer

ubuntucymraeg — Sat, 04 Feb 2012 10:55:06 +0000

Mae rhaglen get-iplayer yn galluogi defnyddwyr Ubuntu i lwytho copi cadw MP4 o raglenni o wefan iPlayer BBC. I lwytho’r meddalwedd chwiliwch am get-iplayer yng Nghanolfan Meddalwedd Ubuntu – bydd CMU yn sicrhau bod pecynnau eraill sydd angen i redeg y rhaglen yn cael eu llwytho hefyd.

Rhaglen llinell orchymyn yw get-iplayer, ac mae cyfarwyddiadau ar sut i’w defnyddio ar eu gwefan. Dyma un enghraifft o’r rhaglen ar waith. Dylid defnyddio terfynell i weithredu’r gorchmynion.

Chwilio am ddrama Inside Men: get_iplayer –type=tv “Inside Men”

sy’n rhoi’r canlyniad hwn i ni: INFO: 1 Matching Programmes 399: Inside Men – Episode 1, BBC One

Llwytho’r rhaglen drwy ddefnyddio’r rhif o’r canlyniad: get_iplayer –get 399 fydd yn llwytho ffeil MP4 o safon dda a maint cymharol fawr (350mb) i’ch plygell cartref.

Macrall Wedi Ffrio yn Popty Ping Plyci !

Criw C2 — Fri, 03 Feb 2012 23:45:00 +0000

Heno fe glywon ni’r gan ddiweddaraf i gael ei thaflu fewn i Bopty Ping Plyci – Macrall Wedi Ffrio gan Endaf Emlyn!

Mae Plyci wedi bod yn ailgymysgu rhai o ganeuon fwyaf adnabyddus Cymru ar gyfer Huw Evans, a Rhodri ap Dyrfrig oedd y diweddaraf i enwebu can. Pa gan fydde chi’n ei daflu fewn??

In order to see this content you need to have both Javascript enabled and Flash Installed. Visit BBC Webwise for full instructions. If you’re reading via RSS, you’ll need to visit the blog to access this content.

Yr arweinyddiaeth – Leanne Wood

Dyfrig — Fri, 03 Feb 2012 22:45:00 +0000

Mae ymgeisyddiaeth Leanne Wood am arweinyddiaeth Plaid Cymru wedi bod ar fy meddwl tipyn heddiw. Cafodd le amlwg mewn erthygl yn y Guardian ddoe a arweiniodd at flog diddorol gan Betsan Powys heddiw A fel mae’n digwydd, mae hi wedi bod yn Nyffryn Nanlle heno, yn siarad ac aelodau; er nad oeddwn i yno fy hun, mae ambell un ar fy ffrwd Twitter wedi nodi bod dros 100 yn bresennol yno.

Yn ol John Harris yn y Guardian, Leanne Wood yw’r ffefryn i enill y ras. Dwi ddim yn dymuno bod yn amharchus tuag at Harris, gan fy mod yn mwynhau llawer o’i ysgrifennu. Ond newyddiadurwr yn ysgrifennu am gerddoriaeth yw Harris yn wreiddiol, sydd bellach yn ysgrifennu darnau gwleidyddol eithaf meddal, yn aml yn ymdrin a chymunedau dosbarth gweithiol, a’u dadrithiad gyda Llafur. Ysgrifennodd lyfr am yr union bwnc yma nol yn 2005 Yn y gyfrol honno, mae’n rhoi ychydig o le i Blaid Cymru, gan ysgrifennu darn yn clodfori’r Aelod Seneddol disglair, ifanc, Simon Thomas – a gollodd ei sedd yn San Steffan rai misoedd yn ddiweddarach. Felly maddeuwch i mi os nad ydw i’n rhoi gormod o bwys ar ddadansoddiad Mr Harris.

Un o wendidau Harris yw ei fod yn canolbwyntio yn ormodol ar straeon personol. Mae yn hoff o greu naratif afaelgar, yn troi o amgylch cymeriadau cryf (sydd ddim yn ormod o her i’w crynhoi mewn erthygl papur newydd o rhyw fil neu ddwy o eiriau). Ac mae stori Leanne Wood, ar hyn o bryd, yn un dda. Mae ganddi gefnogaeth rhai o enwau mawr y Blaid, ac ar Twitter a Facebook, ei henw hi sydd i’w glywed amlaf o beth dipyn. Hi yw’r lleiaf traddodiadol (o ran cefndir cymdeithasol), a’r mwyaf radical (o ran gwleidyddiaeth), o’r pedwar sydd yn y ras. Mae wedi adnabod yr angen am bendantrwydd ac eglurder ynglyn a phwrpas a chyfeiriad y Blaid, ac wedi gosod yr agenda; i’r fath raddau fel bod hyd yn oed Dafydd Elis-Thomas wedi rhoi semantics o’r neilltu, am y tro. Serch hyn i gyd, dwi’n credu nad oes gan Leanne obaith o enill, ac mae yn y trydydd safle – tu ol i Elin Jones a DET – fydd hi’n gorffen y ras.

Pam? Yn bennaf, oherwydd nad oes ganddi sylfaen gref o gefnogwyr ymhlith aelodau o’r Blaid, problem sydd yn mynd i gael ei gwaethygu gan y system bleidleisio gyfrannol. Dwi’n aelod o gangen Dyffryn Ogwen, sef yr ail gangen fwyaf yng Nghymru, ar ol Caernarfon. Mae llawer iawn o’r aelodau hyn wedi cefnogi Plaid Cymru ers degawdau, rhai – fel fi – yn blant i’r genhedlaeth o bobl ifanc a dorrodd gyda traddodiad Llafur/Rhyddfrydol eu rhieni ynghanol yr 20fed Ganrif i ymuno a Phlaid Cymru. Mae’r rhain yn bobl sydd yn adnabod Dafydd Elis-Thomas yn dda, a sydd yn teimlo cysylltiad teuluol ag o; mae llawer iawn o enw da Plaid Cymru yn Arfon a Meirionydd yn deillio o’r gefnogaeth a roddodd y ddau Ddafydd a Gwynfor Evans i’r cyn-chwarelwyr a’u teuluoedd a gafodd eu taro gan psilicosis. Er fod DET yn ffigwr dadleuol, i nifer fawr o aelodaeth y Blaid yng Ngwynedd – sydd yn gyfran helaeth iawn o holl aelodaeth y Blaid – fe fydd Dafydd Elis-Thomas yn ddewis naturiol i arwain.

‘Does gan Elin Jones ddim o’r un traddodiad o gefnogaeth, ond mae hi’n apelio at yr un garfan o aelodau yng Ngheredigion. Bydd ei record fel gweinidol eithriadol o lwyddianus yn y Cynulliad, ynghyd a’r plwyfoldeb sydd yn teyrnasu yn y Gymru Gymraeg o dan faner “bro-garwch”, yn golygu y bydd hi yn mynd a chanran uchel o bleidlais Ceredigion a Sir Gar – dwy ardal arall sydd yn gartref i nifer helaeth o aelodau Plaid Cymru. Ac fe dybiwn i y bydd ‘na gyfran helaeth o gefnogwyr Elin Jones yn rhoi ail bleidlais i DET, fel y bydd ei gefnogwyr ef yn rhoi ail-bleidlais iddi hi.

Mae gwendid ymgrych Leanne, yn fy marn i, yn adlewyrchu y gwendid sylfaenol sydd yn rhedeg drwy Blaid Cymru ar y funud, o ran ymgyrchu. Mae ei chefnogwyr yn weithgar, yn ymroddedig ac yn frwd; mae nhw’n ymgyrchwyr meddylgar, sydd yn benthyg arferion arloesgar o bedwar ban byd; yn ifanc, ac yn deallt sut i ddefnyddio’r cyfryngau newydd. Ond mae nhw’n ddall i’r ffaith nad yw’r tactegau hyn mor effeithiol ar lawr gwlad yn y rhannau hynny o Gymru sydd yn dir ffrwythlon i Blaid Cymru. Nid yw ymgyrch Twitter wych, neu darn cefnogol yn y Guardian, yn gwneud mymrun o wahaniaeth ar strydoedd Dyffryn Ogwen.

Dwi ddim yn dymuno swnio fel deinasor: mi ydw i’n ddyn sydd yn byw am bob dim technolegol (ac mewn bywyd arall yn cadeirio fforwm gyhoeddus sydd yn gwthio syniadau radical am bwysigrwydd y cyfryngau rhyngweithiol). Ond mi ydw i’n adnabod yr ardal o’m cwmpas yn reit dda. Mae Alun Ffred yn Aelod Cynulliad poblogaidd ym Methesda oherwydd ei fod yn rhoi prynhawn o’i amser i eistedd mewn neuadd gymuned oer unwaith bod rhyw dair wythnos i helpu i ddatrys problemau pobl leol. Mae fy nghyd-aelod lleol ar Gyngor Gwynedd, y Cynghorydd Ann Williams (Ogwen), yn cerdded hyd a lled ei ward yn wythnosol, yn siarad gyda ei phobl. Y math hyn o waith sydd yn gwneud Arfon yn sedd ddiogel i Blaid Cymru, a nid ei hymgyrch genedlaethol ddeniadol ac arloesol. Mae’r deniadol a’r arloesol yn bwysig, ond eisin ar y gacen ddylai o fod, a nid swmp a sylwedd unrhyw ymgyrch.

Ond beth am yr ymgeisydd ei hun? Mae ei gwleidyddiaeth yn wahanol iawn i fy ngwleidyddiaeth i, ond gellid dweud hynny am lawer iawn o aelodau Plaid Cymru – a dwi’n derbyn mae y fi yw’r eithriad yn y fan hyn, nid Leanne Wood. Fe ddywedodd hi rhyw dro y byddai’n ymuno a phlaid Respect, pe na bai Plaid Cymru yn bodoli, ac mae hynny’n fater o bryder i mi. Dwi’n credu bod angen i Blaid Cymru fod yn gynhwysol, gan leoli ei hun ar y tir canol gwleidyddol; a yw hyn yn gydnaws ac arweinydd sydd yn datgan cefnogaeth i blaid eithafol asgell chwith? Am yr un rheswm, mae ei brwdfrydedd dros “sosialaeth” yn broblem fawr i mi (er y gellid cyhuddo Dafydd Elis-Thomas hefyd o fyw yng nghysgod yr hen syniadaeth ddifaol honno hefyd). Ers goruwchafiaeth Tony Blair mae ‘na son mawr am y “Clause Four Moment” fel cam hanfodol wrth adfywio plaid wleidyddol. I mi, byddai torri ymaith ymrwymiad cyfansoddiadol Plaid Cymru i “sosialaeth” yn rhoi’r foment bwysig hon i’r Blaid, ac yn sicr nid Leanne Wood fyddai’r arweinydd i arwain y frwydr honno.

Serch hynny, mae’r ychydig fisoedd diwethaf wedi dangos fod gan Leanne Wood ddawn arbennig fel ymgyrchydd, a’r gallu i danio dychymyg rhai o’r to ifanc sydd wedi dadrithio gyda Phlaid Cymru. Mae wedi dangos ei gwerth i Blaid Cymru, ac wedi gwneud achos da iawn dros chwarae rol gyhoeddus amlycach. Draw dros yr Iwerydd, mae ymgyrch arlwyddol America yn dechrau codi stem, a fedra i ddim peidio a theimlo y byddai Leanne Wood yn gwneud dirprwy da iawn i Elin Jones ar balanced ticket mewn ras ar gyfer Arlwydd Cymru.

glaw sydyn

Emma Reese — Fri, 03 Feb 2012 21:50:00 +0000

Pan oeddwn i ar adael y tŷ p’nawn ‘ma i gasglu’r plant, dechreuodd fwrw glaw ond dim llawer. Felly adawais i’r tri mochyn cwta ar y dec cefn iddyn nhw fwynhau’r awyr iach. Wedi’r cwbl roedd yna gadair os rhaid iddyn nhw gael cysgod rhag glaw. Hanner awr wedyn dechreuodd fwrw’n ddifrifol efo mellt a tharanau! Penderfynais i frysio’n ôl ar ôl casglu ond un o’r plant. Daeth y glaw yn drwm ar ffwrdd; roedd y goleuadau traffig i gyd yn goch! Gollyngais fy mab wrth ddrws y garej, yna i ffwrdd â fi i gasglu fy merch a oedd yn aros amdana i yn y glaw. Erbyn i ni gyrraedd adref o’r diwedd, stopiodd y glaw, a ffeindiais i’r moch cwta yn eu cwt yn bwyta eu bwyd yn hapus wedi cael eu sychu gan fy mab.

CLWB CHWARE TEG!

Llinos — Fri, 03 Feb 2012 18:28:00 +0000

2il Chwefror 2012 – Noson Bananas! Noson amrywiol a blasus! Edrych ar rinweddau cymeriad Duw a rhinweddau naturiol iachus bananas! Lluniwyd gweddiau ar ein coeden bananas ac i ddiweddu roedd pawb yn gwneud banana sblit i’w fwyta!

CLWB HWYL A SBRI

Llinos — Fri, 03 Feb 2012 18:26:00 +0000

1af Chwefror 2012 – cychwynwyd ar Ddameg Porthi’r 5000 heno gan wneud model. Bydd rhaid cyflwyno’r stori yr wythnos nesa gobeithio – gan nad oedd ond 4 yn y Clwb heno – gobeithio bod pawb yn gwella’n dda wedi i frech yr ieir darro’r pentref!